Espacios naturales n’Asturies pa disfrutar del deporte na naturaleza

Asturies, tierra de montes maxestosos y paisaxes cautivadores, acueye una xoya escondida pa los amantes del ciclismu: los sos puertos de monte, destacando los llagos d’Enol y La Ercina, L’Angliru, L’Alto’l Palo, La Cobertoria y El Gamoniteiru, La Farrapona, Payares y Cuitunigru, Les Praeres, L’Acebu, El Picu Renorios o la Capiya del Alba.

El Puerto Payares ye amás puertu indispensable de pasu de la Vuelta Ciclista España.

Acullá de los puertos de monte reconocíos y desafiantes, atópense carreteres sinuoses que lleven a puertos menos transitaos, pero igual d’impresionantes.

Estes rutes ufierten a los y les ciclistes la oportunidá de descubrir la guapura virxe de la rexón, con paisaxes monteses, mates trupes y vistes panorámiques que te dexen plasmáu. Estes carreteres son una ayalga por descubrir, desafiando les piernes y l’espíritu aventureru de quien quieren esplorar sitios únicos na so busca d’emociones nueves en dos ruedes, como son les carreteres de Casielles,  La Vega Bovies, La Teyerona, El Monte Deva, El Ḥitu d’Escarandi, L’Alto de Murieḷḷos, Viḷḷamarcel, La Collada Amieva, La Degollada, La Bustariega, La Bovia, La Collada Tarañes, La Llomba Carqueixa, Banduxu, L’Estreitín y La Llosa Alfonso.

Asturies ye un paraísu pa les persones amantes del senderismu y la escalada y p’aquelles que quieren gociar de vistes espectaculares del paisaxe. N’Asturies tenemos 128 picos de más de 2.000 metros d’altitú y más de 500 montes que superen los 1.500 metros.

Destaquen como picos más altos d’Asturies, con más de 2.600 metros, La Torre Cerréu, La Torre Bermeya y La Morra Navarro. Asturies, bañada pol mar Cantábricu, abraza dellos paisaxes marcaos pol verde y la mar, tien 472 km de costa y 272 km de playes, ideal pa la práctica de deportes acuáticos, como’l surf, kitesurf, windsurf, paddle surf, bucéu o natación n’agua abierto.