Xuegos deportivos del Principáu d’Asturies
L’oxetivu del programa de los Xuegos Deportivos ye la creación de vezos deportivos n’edaes tempranes, la meyora de la salú de los y les deportistes n’edá escolar, la educación en valores, el fomentu del espíritu deportivu, la meyora de la convivencia y el respetu a les normes y a los otros y otres. Esti programa amás ta dirixíu sobre manera a la prevención de la violencia en materia deportiva y al fomentu de la igualdá de xéneru.
Ye por eso polo que los xuegos deportivos impliquen a la Dirección Xeneral d’Actividá Física y Deporte, Conceyos, Federaciones Deportives, Centros Escolares y Clubes, amás de l’aportación d’otres entidaes privaes que col so patrociniu collaboren a la promoción y fomentu de la práctica deportiva n’edaes tempranes.
Los y les deportistes dende’l primer cursu d’Educación Primaria hasta cuartu cursu de la Educación Secundaria Obligatoria, pueden practicar dos deportes individuales y dos deportes colectivos a lo llargo de tol cursu escolar. Pa fomentar la participación, tolos gastos derivaos de la práctica deportiva y la competición son subvencionaos pola Alministración pública.
