El sábadu pasáu, 5 de xunetu, Valgrande-Payares dio una bienvenida espectacular al branu col so Primer Festival de Monte, un eventu que marcó’l principiu d’una temporada estival atarriquitada d’actividaes y que s’encuadra na celebración d’Asturies como Rexón Europea del Deporte 2025. Entamáu por ADN Asturies Deporte y Naturaleza, la xornada foi un éxitu, atrayendo a bien de públicu que pudo disfrutar de la estación dende les 10:00 hasta les 20:00 hores.
La xornada cuntó con presencia institucional bien destacada, cola asistencia de Vanessa Gutiérrez, conseyera de Cultura, Política Llingüística y Deporte, y Manuela Eleazar Fernández Ena, directora xeneral d’Actividá Física y Deporte, que quixeron sofitar esta iniciativa que fusiona deporte, naturaleza y cultura.
A lo llargo de tol día, los asistentes pudieron disfrutar d’una programación variada. Hubo talleres d’iniciación a la marcha nórdica al cargu de Manuel Ángel Blanco y sesiones de Yoga nos cumales impartíes por Chusa Cuendias, perfectes pa conectar col entornu. El festival tamién incluyó un mercáu tradicional con artesanos y productos locales, y l’ambiente amenizáronlu la Banda de Gaites Güestia con un pasucáis y un conciertu pa pesllar con músicos locales y el grupu Mokomitas. Los más pequeños disfrutaron del espectáculu de marionetes del Circo la Luna.
El telecabina foi ún de los grandes protagonistes del día, con munchísima xente optando por usalu pa xubir a lo cimero de la estación. Dende ellí, los visitantes pudieron gociar de les vistes panorámiques espectaculares, pasiar pel entornu privilexáu y hasta disfrutar d’una comida nes altures primero de baxar, aprovechando al máximu la esperiencia de monte.
Esti festival nun inauguró la temporada braniega namás, sinón que valió d’empiezu a un programa continuu d’actividaes que se va estender cada fin de selmana en Valgrande-Payares hasta esti 14 de setiembre, col telecabina operativu pa siguir ufiertando esperiencies úniques nel monte asturianu.
