El domingu 6 d’abril, les instalaciones d’El Campo’l Morgal enllenáronse d’enerxía y compañerismu na celebración de la segunda Xornada ‘Muyer y Deporte’. Lo qu’antemanáremos como una mañana dedicada a l’actividá física, convirtióse nuna realidá vibrante, superando toles espectatives.
Cuntemos cola participación entusiasta d’alredor de 150 muyeres mayores de 35 años, que demostraron que la edá nun ye torga pa disfrutar del deporte y los vezos saludables. Dende les 9 de la mañana, la recepción de les participantes dio’l pistoletazu de salida a una xornada enllena de movimientu.
La mañana empezó con una clas grupal d’activación bien animada empobinada por Luisa Álvarez nes pistes de tenis cubiertes, preparando los cuerpos pa l’acción. Depués, les asistentes tuvieron la oportunidá de somorguiase na práctica llibre d’hasta 15 modalidaes deportives diferentes. Dende’l rugby colos equipos Xixón Rugby Club (Madreñes), Uviéu Rugby (Oses), Llanera Rugby y Belenos Rugby Club, hasta’l fútbol feminista de DiverXente, el hoquei del Club Hoquei Lloberu, el patinaxe del Club Patín Cuelebre, el vóleibol de Voley La Calzada, y el béisbol con Miners Béisbol Club. Amás, pudieron probar disciplines como’l fútbol andando, la esgrima, los bolos, el bádminton y el tiru con arcu gracies a la collaboración de les sos federaciones respectives. La inclusión tamién tuvo un espaciu destacáu cola participación de l’Asociación Sin Límites (deporte adaptáu) y Carmen López, la surfista adaptada.
A metá de la xornada, un descansu merecíu y un bocáu qu’apurrió Más y Más recargaron la enerxía pa la segunda parte de la práctica deportiva. La mañana remató con una clas grupal d’estiramientos nuevamente al cargu de Luisa Álvarez, poniendo’l ramu a l’actividá física.
Pa rematar, llevóse a cabu un actu pa pesllar bien emotivu cola entrega de diplomes, un momentu pa reconocer l’esfuerciu y la participación de toes.
Esta segunda Xornada ‘Muyer y Deporte’ reafirmó’l compromisu del Principáu d’Asturies cola promoción del deporte femenín y los vezos saludables, afianzándose como un espaciu fundamental p’alcontrase, aprender y pasalo bien. ¡Esperamos con ilusión la edición viniente!
