La conseyera Vanessa Gutiérrez va recibir esti xueves en Bruseles la distinción internacional, concedida pol proyectu ‘ADN: Asturies, Deporte y Naturaleza’
La Conseyería de Cultura, Política Llingüística y Deporte aumenta hasta cuasi 3 millones les ayudes destinaes a Acción Cultural, una cantidá que multiplica por once l’asignación cola que cuntaba esta área nel 2019. El Gobiernu d’Asturies demuestra nos presupuestos del 2025 el so compromisu cola cultura, el deporte y el patrimoniu como elementos esenciales del so proyectu.
La conseyera de Cultura, Vanessa Gutiérrez, presentó esta tarde na Xunta Xeneral unes cuentes que reflexen el determín del Gobiernu d’Asturies de facilitar “un accesu universal al deporte y a l’actividá física a tolos niveles”. Esti respaldu súmase a otru “oxetivu fundamental nel que trabayamos: polos derechos culturales de la ciudadanía, por garantizar el so exerciciu y tamién por que seyan respetaos, porque tamos falando del respetu a la identidá de les persones a les que nos debemos”, esplicó.
La conseyera anunció la distinción d’Asturies como Rexón Europea del Deporte 2025, un llogru algamáu al traviés del programa ADN: Asturies, Deporte y Naturaleza, pal que s’acutaron 470.000 euros nos presupuestos del añu que vien. Precisamente, esti mesmu xueves, la conseyera va recibir esti gallardón en Bruseles.
El programa ADN: Asturies, Deporte y Naturaleza representa un apueste pola actividá física y un compromisu estratéxicu col desenvolvimientu integral de la comunidá. Esti proyectu va dexar desplegar nel 2025 un programa ampliu d’actividaes, formación y acciones vinculaes a la reconocencia como Rexón Europea.
El plan incluye eventos deportivos al aire llibre, actividaes escolares y programes enfocaos na salú mental y el bienestar. Ente les iniciatives clave atópase la implementación de la Rede ASTUR (Rede de Sofitu y Altu Rindimientu n’Asturies), diseñada pa prevenir trestornos alimenticios y mentales ente deportistes. Amás, va impulsase’l turismu deportivu, p’afianzar el Principáu como un destín de referencia pa eventos ciclistes, de monte y acuáticos, al tiempu que se van fortalecer les entidaes deportives locales con campeonatos d’altu nivel.
Les instalaciones deportives van esperimentar una meyora significativa con un aumentu presupuestariu del 74 %, hasta los 4.375.428 euros. Esti impulsu incluye fondos destinaos a la dixitalización y modernización del deporte con programes como’l Plan de Prescripción d’Exerciciu Físicu, enfocáu a la prevención y el fomentu de vezos saludables.
Tocante a la promoción de la igualdá, el presupuestu afianza la Xornada de Muyer y Deporte con una medría de 48.000 a 100.000 euros. Amás, esta iniciativa va cuntar con una llinia específica d’ayuda de 50.000 euros pa facilitar la conciliación a muyeres deportistes, árbitres o entrenadores con fíes y fíos pequeños al cargu.
Amás, la promoción de los bolos cuadruplica la cuantía: pasa de 8.000 a 35.000 euros que se destinen a la Federación de Bolos cola mira de visibilizar y afitar les diferentes disciplines que axunten tradición, deporte y identidá. Esta cantidá súmase a los 30.000 euros destinaos al deporte tradicional. Otra manera, l’importe destináu a les entidaes de deporte base xube a 100.000 euros al traviés d’una convocatoria específica. El sofitu a clubes d’altu nivel caltiénse con una partida de 1 millón, mentes que les subvenciones a federaciones deportives medren un 48 %, de los 675.000 euros d’anguaño hasta 1.000.000 nel exerciciu que vien.
Nos presupuestos pal 2025, la conseyería destina 1.145.000 euros a los Xuegos Deportivos cola mira de que’l deporte escolar siga siendo un referente na comunidá y dexe a los neños y neñes disfrutar de les distintes disciplines ensin importar la so condición socioeconómica. Per otru llau, la rede CEPAFYS (Centros Escolares Promotores de l’Actividá Física y la Salú) va recibir una dotación de 40.000 euros pa promocionar l’actividá física tamién ente menores. Como novedá, l’añu que vien va implementase’l programa Deporte y Valores, que ta basáu nel xuegu llimpiu y la promoción de valores nel deporte. Esta partida va tar dotada con 75.000 euros.
Acción Cultural y Normalización Llingüística
El presupuestu destináu a ayudes culturales en concurrencia competitiva ronda los 3 millones, lo que supón una medría del 21,31 % al respective del 2024 y un 1.100 % en comparanza col 2019. Ente les acciones más destacaes atópase l’ampliación de los circuitos d’Asturies, Cultura en Rede, que’l so presupuestu xube cuasi un 30 %, algamando los 1.465.000 euros. Tamién la dotación pa la Fundación Ópera d’Uviéu, con una aportación qu’aumenta de los 110.000 euros del 2019 a 250.000 euros nel 2025. La dotación pa los Servicios de Normalización Llingüística tamién aumenta; nesti casu, un 5 %. Les partíes p’asociaciones y fundaciones xuben abondo, dende 50.000 euros nel 2024 a 200.000, y incluyen llinies nueves destinaes a proyectos audiovisuales, amás de 100.000 euros p’actividaes empobinaes al espardimientu de la cultura tradicional.
Con un presupuestu afianzáu y una medría del 56 % al respective del 2019, l’área de Patrimoniu Cultural afita la so importancia. Destaquen los 450.000 euros destinaos a la restauración d’horros, paneres y cabazos, con midíes innovadores como’l pagu antemanáu de les ayudes y l’ampliación del plazu d’execución a un añu de magar se conceda la subvención. Amás, les subvenciones en materia de patrimoniu cultural afiáncense nos 1,25 millones, un 77 % más que nel 2019. Nel 2025 va realizase la primer convocatoria de subvenciones pa bienes etnográficos en brañes y mayaes. Paralelamente, sigue’l Plan de Castros, con una dotación de 280.000 euros, y van executase proyectos rellacionaos coles cueves d’arte rupestre, reforciando’l so caltenimientu y xestión sostenible como Patrimoniu Mundial de la UNESCO.
Hasta’l momentu, la execución presupuestaria de la conseyería anguaño llega al 82,5 %. Sobresal, por exemplu, la execución de cuasi un 100 % nes partíes financiaes con fondos europeos na Dirección Xeneral de Patrimoniu Cultural.
