La Conseyería de Cultura, Política Llingüística y Deporte presentó la marca ADN. Asturies, Deporte y Naturaleza pa promocionar el Principáu como destín turísticu y deportivu, que va valir pa emponderar la naturaleza como un elementu vertebrador de les diferentes disciplines y historia deportiva de la comunidá.
El Principáu pon asina l’acentu nes posibilidaes qu’ufierta Asturies como destín deportivu, los equipamientos públicos y privaos a disposición de la ciudadanía y les competiciones que se desenvuelven per toa Asturies en contactu cola naturaleza. Sobre manera, aquelles qu’ayuden a convertir el deporte nun espaciu seguru, inclusivu y igualitariu al empar que son motor económicu.
Na ellaboración y llanzamientu d’esta marca, Cultura tuvo en cuenta les característiques de los deportes tradicionales y el texíu asociativo asturiano qu’ayuda a sostener diariamente la identidá de la comunidá nel ámbitu deportivu.
N’ADN. Asturies, Deporte y Naturaleza van tener protagonismu los deportistes asturianos d’altu nivel, y el personal técnico que se desempeña nes competiciones. Yá mostraron el sofitu a esta iniciativa directivos y directives del sector, atletes d’altu nivel y aficionaos de modalidaes variaes. Nel videu de llanzamientu participaron la piragüista olímpica Sara Ouzande, la surfista profesional Lucía Martiño, el deportista mozu de vela adaptada Iyán Pérez, el ciclista olímpicu Samuel Sánchez y l’alpinista Rosa Fernández.
Amás del espardimientu que va suponer la puesta en marcha ADN. Asturies, Deporte y Naturaleza, la Conseyería de Cultura, Política Llingüística y Deporte aspira con esta marca a distinción europea d’Asturies como Rexón Europea del Deporte 2025 que concede la entidá ACES Europe. Por esta razón, esti vienres, coincidendo’l Día Mundial de Protección de la Naturaleza cola presentación de la candidatura europea a Aces Europe, el Gobiernu autonómicu va allumar de verde la torre de La Llaboral, en Xixón.
Esta iniciativa ta alliniada colos oxetivos de la Estratexa de Turismu del Principáu d’Asturies 2020-2030, que propón promocionar la práctica del deporte n’entornos naturales, impulsando’l cicloturismu y el senderismu, ente otres disciplines. La creación de la marca ADN súmase, colos mesmos oxetivos de divulgación cultural asociada a la naturaleza, a la d’otres yá vixentes como la marca Ciclismu por naturaleza —que busca asitiar el Principáu como un destín líder en cicloturismu—, y la marca Asturies, naturaleza minera, creada pa promocionar los nuestros paisaxes industriales y el so patrimoniu.
