FEDERACIÓN DEPORTES D’IVIERNU PRINCIPÁU D’ASTURIES
MARCOS BAYÓN IMPÓNSE NA PRUEBA D’ESQUÍ EN YERBA DE PAYARES
El deportista llogra’l primer puestu con un tiempu total de 55,48 segundos nuna competición enmarcada en “Asturies como Rexón Europea del Deporte 2025”
Payares, 28 d’agostu del 2025 – El pueblu de Payares acoyó esti domingu 24 d’agostu una edición nueva de la prueba d’esquí en yerba, modalidá que sigue ganando adeptos nel Principáu d’Asturies y que fai posible caltener activa la práctica d’esti deporte nos meses estivales.
Esta competición desenvuélvese nel marcu de “Asturies como Rexón Europea del Deporte 2025”, reafirmando’l compromisu de la rexón col deporte y la vida al aire llibre, amás del so apueste pola promoción d’actividaes deportives que fomenten vezos saludables ente la ciudadanía.
La competición, disputada en dos mangues, axuntó a seis participantes, cinco homes y Beatriz Bayón, única representante femenina, que se dieron cita nel pueblu asturianu pa demostrar la so destreza enriba de la hierba.
El trunfu correspondió a Marcos Bayón, quien, con un tiempu total de 55,48 segundos, suma de les sos dos meyores mangues, llevó la victoria nuna prueba que se caracterizó pol nivel técnicu mostráu por tolos participantes. La presencia de Beatriz Bayón amestó un valor especial a la competición, demostrando que l’esquí en yerba ye una disciplina qu’atrái tanto a homes como a muyeres.
Mención especial merecen dellos nomes propios que son yá clásicos nesta competición. Ente ellos, Franco Suárez, qu’un añu más volvió tar presente como representante y impulsor firme d’esta disciplina, y Alan Muñiz, otru habitual na cita de Payares, que cola so participación ayuda a caltener vivu l’espíritu competitivu y festivu de la prueba.
La prueba d’esquí en yerba de Payares afiánzase como una cita imprescindible nel calendariu deportivu asturianu, permitiendo que los amantes del esquí puedan seguir practicando’l deporte favoritu acullá de la temporada ivernal y calteniendo vivu l’espíritu deportivu del pueblu tol añu.
