Asturies y L.luarca, coles sos designaciones europees respectives, únense pa dar empiezu a la Selmana Europea del Deporte nel Principáu. Esti finxu festéxase col Foru Avieyamientu Activu, un eventu clave que forma parte de la programación d’ADN Asturies (Deporte y Naturaleza), que vien desenvolviéndose dende empiezos d’añu pa impulsar la designación d’Asturies como Rexón Europea del Deporte. L’alcuentru tien como oxetivu destacar la importancia de la vida activa pa vivir una vieyera plena y saludable.
Programa del Foru Avieyamientu Activu
Mesa Redonda 1: “La importancia de llegar activos a la vieyera”
Esta primer mesa va cuntar cola participación d’espertos que van encarar los beneficios de caltener l’actividá física pa la salú y l’autonomía personal. Van participar Enrique Rodríguez Nuño, director xeneral d’autonomía personal y mayores, Beatriz Ramos, terapeuta ocupacional con esperiencia amplia en xeriatría, y Diego García, sicólogu xeneral sanitariu y presidente de l’Asociación de Sicólogos Deportivos d’Asturies. La moderadora d’esta mesa va ser la periodista Ana María Serrano García.
Mesa Redonda 2: “La importancia de la microbiota y los curiaos na alimentación pensando na vieyera”
Na segunda mesa va falase de la rellación ente la nutrición y l’avieyamientu saludable. Va cuntar cola presencia de María Antonia Rodríguez, nutricionista fundadora d’una empresa de Nutrición Rural; Miguel Gueimonde, investigador científicu del CSIC; y Javier Fernández, profesor de microbioloxía y espertu en microbiota de la Universidá d’Uviéu. La moderadora va ser la periodista María Rendueles.
Estensión de la Selmana Europea del Deporte a 15 conceyos asturianos
Amás del foru en L.luarca, y nel marcu de la Selmana Europea del Deporte (del 23 al 27 de setiembre), va llevase a cabu una actividá diaria d’iniciación al entrenamientu funcional en 15 conceyos d’Asturies. Estes sesiones, gratuites y d’inscripción llibre, tán dirixíes a persones de 55 años p’alantre.
Pa la execución d’estes actividaes, la organización cuntó cola collaboración del Colexu Oficial de Llicenciaos en Ciencies de l’Actividá Física y el Deporte d’Asturies (COLEF Asturies) y de trés de les sos empreses asociaes:
- Zona Occidental: Pez y Ardilla.
- Zona Central: Gimnasio Pravia.
- Zona Oriental: DarkLion.
Les actividaes van desenvolvese en dellos sitios d’Asturies, incluyendo les villes de Castropol, Ribeseya, Cuideiru, Villaviciosa, La Pola Siero, Cabrales y Ribadeva, ente otres. L’oxetivu ye llevar el mensaxe d’un avieyamientu activu a tol territoriu asturianu.
Pa concluyir l’eventu de L.luarca, va celebrase una clase d’iniciación al entrenamientu funcional a les 16:00 h nel Polideportivu Pedro Llera Losada.
