El 27 de mayu pasáu, la ciudá d’Avilés convirtióse nel puntu d’alcuentru pa los amantes del deporte cola celebración de la xornada «Deporte pa una vida». Esti eventu, encuadráu nel programa ADN «Asturies Deporte y Naturaleza, Rexón Europea del Deporte 2025», desenvolvióse de manera simultánea a la prestixosa Gala del Deporte Asturianu, creando un día memorable pa la comunidá deportiva rexonal.
Una mañana de reflexón y debate na Casa Municipal de Cultura
La xornada arrincó na Casa Municipal de Cultura d’Avilés con una inauguración al cargu de la directora xeneral d’Actividá Física y Deporte del Principáu d’Asturies: Manuela Eleazar Fernández Ena.
A lo llargo de la mañana, el salón d’actos foi l’escenariu de dos meses redondes enfocaes nel deporte base:
- La primera, «Crecer col deporte: la toma de determinos y l’abandonu na adolescencia», trató los factores qu’influyen en que la mocedá, sobre manera les moces, dexen de practicar deporte. Cuntemos cola participación valiosa de Sara Lolo (xugadora del Telecable Hoquei Club), María Carrión (deportista n’activo y madre de la xugadora Iyana Martín), y Óscar Fernández (campeón d’Europa de Yudu). La mesa moderóla la periodista de RPA Bea Otero.
- De siguío, la mesa «Vezos saludables pa mocedá: sueñu, nutrición y movimientu» destacó la importancia del descansu, la nutrición y otros vezos nel rindimientu diariu y deportivu. Espertes como María Fernández del Valle (doctora n’Actividá Física y Salú), la catedrática Sonia González Solares (investigadora en Dieta, Microbiota Humana y Salú), y la doctora Elena Díaz Rodríguez (bióloga esperta en cronobioloxía), compartieron los sos conocimientos. Cristina Gallo, periodista de RPA, moderó esti debate tan interesante.
Dambes meses cuntaron cola asistencia d’alumnos d’institutos y escueles d’Avilés, y representantes de clubes y federaciones deportives, demostrando’l gran interés nel futuru del nuestru deporte.
Tarde d’actividá y participación nel Centru Cultural Niemeyer
Pela tarde, la esplanada del Centru Cultural Niemeyer tresformóse nun espaciu de diversión y actividá. Como antoxana a la Gala del Deporte Asturianu, el públicu en xeneral y los visitantes pudieron participar animadamente en modalidaes deportives variaes:
- Instalóse una Bolera Portátil de Cuatriada, onde se fixeron exhibiciones y el públicu pudo probar esta modalidá asturiana tradicional, gracies a la Federación de Bolos del Principáu d’Asturies.
- Tamién hubo una Zona de Xuegos Tradicionales Asturianos con delles modalidaes de xuegos autóctonos pa toles edaes, dinamizada pol Club Deportivu 6Conceyos.
- Finalmente, un Rocódromu Portátil d’Escalada Deportiva ufiertó una torre segura y emocionante pa tolos niveles, con un monitor cualificáu de B3SPORTAINMENT.
Un balance positivu pal deporte asturianu
La xornada «Deporte pa una Vida» cumplió de sobra los sos oxetivos de fomentar el deporte base, educar sobre vezos saludables, promover l’actividá física y visibilizar al Principáu d’Asturies como Rexón Europea del Deporte 2025. Esti eventu non solo arriqueció l’axenda deportiva alredor de la Gala del Deporte Asturiano, sinón que tamién reforció’l compromisu con un estilu de vida activu y saludable en tola rexón.
