La Conseyería de Cultura entama talleres gratuitos los díes 23, 24, 30 y 31 d’agostu nes instalaciones de la estación
La Conseyería de Cultura, Política Llingüística y Deporte impulsa’l programa Veranu en Fontes, con actividaes deportives y d’ociu gratuites na rodiada de la Estación de Fontes d’Iviernu. Les propuestes van desenvolvese los fines de semana del 23, 24, 30 y 31 d’agostu, cola mira de fomentar l’usu del equipamiento más p’allá de la temporada de nieve y averar la práctica deportiva a la ciudadanía nun entornu natural privilexáu.
El programa va arrancar el sábadu 23 d’agostu con un taller de marcha nórdica. L’actividá va repetise tamién el sábadu 30, n’horariu de 10 a 12 hores, dende l’aparcamientu de la estación. Trátase d’una disciplina accesible, que combina caminata y técnica de cayaos, recomendada p’ameyorar la condición física y disfrutar del paisaxe del monte d’una manera saludable.
Los domingos 24 y 31 d’agostu va ser el turnu del xeocaching, una actividá d’orientación y aventura. N’horariu de 11 a 14 hores, los participantes van poder descubrir l’entornu natural de Fontes d’Iviernu al traviés d’esta práctica llúdica, que combina deporte, naturaleza y trabayu n’equipu na busca de “ayalgues” escondíes cola ayuda de mapes y coordenaes
La inscripción pa participar nestes actividaes ye de baldre y pue formalizase al traviés d’estos enllace:
- Marcha nórdica: https://forms.gle/J2NZ52UxRCYGHM5X8
- Geocaching: https://forms.gle/e5kiQaHJDsANp1WTA
La iniciativa encúadrase dientro del proyectu ADN. Asturies Deporte y Naturaleza, col que’l Principáu foi reconocíu como Rexón Europea del Deporte 2025, y busca consolidar les estaciones de monte como destinos activos tol añu, con propuestes qu’axunten deporte, naturaleza y turismu sostenible.
