El 1 de xunetu pasáu, nel patiu de la Universidá Llaboral de Xixón, fíxose la exhibición de partíes simultánees del maestru internacional d’axedrez Faustino Oro. Faustino foi’l xugador más mozu de la historia en llograr el títulu de maestru internacional (con namás 10 años, 8 meses y 16 díes) y llámen-y el Messi del axedrez, o’l Pibe d’Oru, atendiendo tamién a la so nacionalidá arxentina.
La exhibición encuadróse dientro del programa de la Dirección Xeneral de Deportes pa los actos de «Asturies: rexón europea del deporte» baxo la marca ADN: Asturies, Deporte y Naturaleza y organizáronla la Federación d’Axedrez del Principáu d’Asturies (FAPA) y la mesma DXD.
En Xixón, Faustino encaróse con 25 xugadores asturianos a la vez, representantes de los más de los clubes de la rexón. Dende neños hasta veteranos de 84 años, incluyendo xugadores fuertes como Roque Ordiz, Marcos Gutiérrez y Iván Patón (los 3 top 10 nel últimu campeonatu d’Asturies) y con presencia femenina abondosa comandada poles medayistes de recién nel Campeonatu d’España de selecciones Claudia Canel, Lucía Molina y Alina Prochaieva.
Sufrió esti maestru arxentín mozu, qu’aspiraba a llograr 25 victories y tuvo a puntu de perder 2 o 3 partíes. Pero, a lo último, acabó con un resultáu sobresaliente: 21 victories, 4 tables y nin una sola derrota. Los «héroes» que foron quien a empatar foron Marcos Gutiérrez, Roque Ordiz, Alina Prochaieva y Marcos Rodríguez. Hai que destacar que tanto la moza Lucía Molina como’l veteranu Antonio Martín Manzano tuvieron a Faustino contra les cuerdes, amás de qu’Iván Patón y la campeona femenina asturiana, Marien Bagues, cariciaron l’empate.
Primero de la exhibición, la FAPA apurrió a Faustino Oro una camiseta de la selección asturiana. El mozu arxentín disputó tamién delles partíes con aficionaos, firmó autógrafos y retratóse colos munchos aficionaos que s’averaron, a pesar del orbayu que nun paraba, al marcu espectacular de la Universidá Llaboral.
