Fontes d’Iviernu (Ayer)

Asitiada nel corazón del Monte Central asturianu, la Estación Ivernal Fontes d’Iviernu ufierta 8,7 km esquiables, dividíos en 15 pistes de dellos niveles: 3 pistes verdes, 3 azules, 6 coloraes y 3 negres. Asina tolos y toles esquiadores, con más o menos esperiencia, pueden esquiar per tolo alto. La estación cunta con remontes d’última xeneración: 3 telesielles, 1 telesquí y 1 cinta, que dexa tresportar 8.200 persones por hora.

Dispón amás de serviciu d’arriendu de material deportivo, escuela d’esquí, cafetería restaurante y accesos cómodos per carretera.

Nos alredores dispónse d’unes 600 places d’agospedamientu, repartíes ente establecimientos de tou tipu: hoteles, hostales, apartamentos, cases rurales y albergues.

La estación atópase nuna zona de riqueza cultural y artística estraordinaria y nel mediu d’una contornada natural privilexada. Ilesies romániques, cases solariegues, pozos mineros y otres muestres de patrimoniu industrial alternen con paisaxes estraordinarios pa descubrir, como les Foces del Río Ayer o la Ruta de Les Foces d’El Pino, ente otros. Y too eso, a namás 70 km d’Uviéu y 84 km de Llión.

La Estación Ivernal Fontes d’Iviernu acueye’l programa Selmana Blanca nel periodu escolar que va d’avientu a abril. Esti proyectu tien como oxetivu principal, fomentar el deporte blancu ente los escolinos del Principáu d’Asturies, y averalos al monte y el mediu natural independientemente del asitiamientu xeográficu de los sos centros.

La práctica deportiva nun ambiente distintu al habitual, la convivencia colos compañeros y compañeres nel monte, y el contactu intensu cola naturaleza y el deporte, son instrumentos educativos de gran valir pa la formación d’esta mocedá.

Na Estación llévense a cabu dalgunos campeonatos d’esquí y, ente ellos, éstos:

Campeonatu d’Asturies d’esquí.
Campeonatu d’Asturies d’esquí de fondu.
Fontes Vertical: Sprint & Vertical Race/0115 (competición que conxuga nun mesmu día dos disciplines diferentes del esquí de monte: un sprint y una “crono” o carrera vertical).