La Regata ADN de Barcu Dragón, prevista primeramente nel Banzáu de Tañes, va celebrase finalmente’l próximu 8 de payares nel Banzáu de Trasona, debíu al baxu nivel d’agua rexistráu nel banzáu Casín.
El cambéu d’allugamientu garantiza les meyores condiciones para’l desenvolvimientu de la competición y la seguridá de los equipos participantes. El Banzáu de Trasona, referente na práctica de deportes náuticos n’Asturies, va ufiertar la redolada ideal para acoyer esta cita deportiva.
La regata va cuntar cola participación de clubes y palistes nes categoríes Mista, Femenina y BCS (Breast Cancer Survivors), ufiertando un espaciu de participación inclusiva y de promoción del deporte para tolos públicos. Les tripulaciones van tar formaes por dolce palistes, un timonel y un tambor, que van competir al ritmu de la coordinación y la fuerza colectivo, esencia d’esta disciplina milenaria.
L’eventu ta entamáu pola Federación de Piragüismu del Principáu d’Asturies (FPPA), cola collaboración de ADN Asturies Deporte Naturaleza y diverses entidaes y patrocinadores, consolidándose como una cita destacada dientro del calendariu deportivu del barcu dragón n’Asturies.
Amás del so componente competitivu, la Regata ADN tien un fuerte calter social y solidariu. Na categoría BCS, les protagonistes van ser muyeres supervivientes de cáncer de mama, qu’al traviés del deporte atopen una forma de empoderamiento, bienestar y compañerismu.
“Esta regata ye muncho más qu’una competición; ye una celebración de la vida, la fuerza y l’unidá que caracteriza al barcu dragón”, señalaron dende la FPPA.
La xornada va concluyir cola entrega de premios y un alcuentru ente los equipos participantes nun ambiente festivo, reflexu del espíritu del barcu dragón: unión, respetu y pasión compartida.
Fecha: 8 de payares de 2025
Llugar: Banzáu de Trasona (Corvera d’Asturies)
Categoríes: Mista, Femenina, BCS
Entama: Federación de Piragüismu del Principáu d’Asturies (FPPA) Collabora: ADN, Asturies Deporte Naturaleza
