La Casa la Cultura de Santalla d’Ozcos convirtióse ayeri nel epicentru del debate sobre’l papel del deporte como motor de desenvolvimientu sostenible nel mediu rural asturianu. El foru Deporte y Desenvolvimientu Rural, parte del programa ADN: Asturies, Deporte y Naturaleza pola mor de la designación d’Asturies como Rexón Europea del Deporte 2025, axuntó a espertos, profesionales y vecinos nuna xornada marcada pola reflexón y l’actividá física.
La xornada empezó a les 10:00 h na Casa la Cultura, qu’acoyó dos meses redondes:
- Fomentu de l’actividá física nel mundu rural (10:20 h): Eduardo Artime, presidente de l’Asociación d’Amigos de la Ría de Navia; Marcos Niño, director xeneral de Retu Demográficu; y Pedro Méndez, de PICANTE SURF en Tapia, debatieron sobre cómo’l deporte pue ayudar a encarar el retu demográficu cola moderación de la periodista Ángela Rodríguez.
- Comarca d’esperiencies per tierra y agua (12:15 h): Juan Carlos Menéndez (Kalyaventura), Naia Pascual (esperta n’observación d’aves) y Ángela Ferreira (historiadora y guía d’Entrambastur) destacaron el potencial turísticu de la rexón col periodista Ángel Fernández como moderador.
La tarde tuvo dedicada a l’actividá física con una ruta de senderismu pol pueblu medieval d’Argul (Pezós), Bien d’Interés Cultural. La salida del autobús foi a les 16:30 h dende la Casa la Cultura y la vuelta fíxose alredor de les 19:00 h. L’actividá tuvo dirixida por Ángela Ferreira, esperta en senderismu y historiadora.
El foru Deporte y Desenvolvimientu Rural dexó un balance positivu, reforciando la idea de que l’actividá física ye una ferramienta clave pa impulsar la calidá de vida, la participación comunitaria y el desenvolvimientu sostenible nes zones rurales d’Asturies.
